عارفه.. نفسى اقولك وحشتينى.. و تحسينى.. نفسى اقولك ضمينى.. تسمعينى.. نفسى احكّى معاكى..و تريحينى.. نفسى تشوفى ابنى و هو بيكبر فى بطنى يوم بعد يوم.. اطمن على مراة ابنى و هى عندك بتكبر يوم بعد يوم.. مش احنا اتفقنا نجوز ابنى لبنتك.. فاكرة؟..
فاكرة لما كنتِ تبقى عايزة تحكيلى على حاجه كنتِ دايماً تقوليلى حاحكيلك بشرط ماتزعقيش.. الوحيدة اللى كانت بتقولى فى وشى انى جامدة و مع ذلك بتحبنى.. فاكرة لما كنت بتقوليلى نفسى اجيب سبع عيال و تقعدى تتخيلى كل واحد حيطلع ايه و شردتيهم كلهم.. فاكرة لما كنا بنقعد نتخيل اننا بنقدم برنامج واحنا قاعدين بعد الدرس.. لسه نفسك تعملى اعلانات ام بى سى 4..
عارفه انى كل ماروح المعادى بفتكر كل مكان روحناه مع بعض.. تعرفى ان المول من غيرك بقى طعمه غريب.. و اللمه مع الشله طعمها مر.. حتى دخولى بيتكم بقيت احسه وضع مش صح.. و لما باشوف صورنا بتوجع قوى..
كتير باقعد افكر طيب هو انا ممكن اخد اول طيارة و اجيلك اسلم عليكى و احضنك فى المطار حتى و بعد كده اخد اول طياره نازله على مصر و ارجع تانى.. باحس كتير انى بس عايزه اشوفك قدامى.. او افتح الباب الاقيكى داخله عليه و جايه تقعدى معانا زى ما كنتِ دايماً بتعملى.. عارفه لما اخواتك بييجوا ببقى مش عايزه اقفل الباب وراهم يمكن تدخلى معاهم..
على قد ما كنت مبسوطه و انا بشترى اول حاجه لابنى على قد ما كنت مفتقداكى قوى اليوم ده.. مش متخيله و لا متقبلة انك مش حتكونى معايا يوم الولادة.. طيب مين اللى حيشيل ابنى اول ما يجى و يرقيه.. و مين حيقعد يناكفنى و انا بختار الاسم.. و مين حيختار معايا فرش اوضته و الوانها.. مين حيحلم معايا حيطلعوا ايه.. مين حيعيش معايا التجربة دى قبل ما تخلص..
احنا جربنا مع بعض كل حاجه قبل كده بس كل اللى بيحصل دلوقتى جديد علينا و كنت محتاجه اعيشه معاكى.. زى ما انا عارفه انك نفسك تعيشيه معايا.. مش قادرة اقولك ارجعى و عيشى معانا هنا علشان مش عايزه اظلمك او ابعدك عن جوزك و حياتك.. بس حاجه واحده ح اقولهالك.. انا بجد مفتقداكى
نفسى احضنك..
وحشتينى..