المواصلات و بلاويها.. و اللى بيجرى فيها

يعنى ايه انزل من بيتنا الساعه 7:30 أوصل الشغل الساعة 10:00.. يعنى ايه.. و ليه.. و مين المسئول.. و علشان ايه طيب.. ما انا محتاجه حد يفهمنى.. يقولى ان تعبى فى الطريق ده بيعود عليه بفايدة معينة.. يا اما يبقى مش المفروض يحصل.. الغريب و اللى يخليك تشد فى شعرك فى الشارع هو ان بعد ما الزنقة تفك أو الاشاره تفتح.. ده لو فتحت اساساً.. بتلاقى ان الشارع فاضى تماماً.. طيب احنا كنا ليه واقفين و ليه الشارع فى الحته دى فاضى و فى الحته اللى احنا واقفين فيها لأ.. اصبحت المشكلة مش انك عندك عربية أو يا حرام بتركب مواصلات.. لان فى الظروف اللى زى دى تتساوى الروؤس..

مش هى دى بقى المشكلة.. المشكلة بقى ورا التأخير ده.. فكام بنى آدم بيروح شغله متأخر لأسباب خارجه عن إرادته.. و كام مصنع واقف حاله لحد ما العمال توصل.. و كام مكتب لسه مافتحش علشان الموظفين بتوعه مزنوقين فى اشاره ابديه.. و كام طالب مالحقش الحصة الأولى و يمكن التانية كمان علشان الطريق واقف.. و كام واحد تعبان حالتهم ساءت.. أو روحهم فاضت إلى بارئهم بسبب إن الاسعاف يا مش عارف يوصلهم يا مش عارف يوصل للمستشفى.. يعنى يرضى مين ده..

ما هو احنا لازم نفكر بالعقل.. لما من زمان و احنا فى المدرسه كان تعداد السكان فى مصربتاع سبعين مليون.. و كل ثانية بنزيد اكتر و اكتر.. لكن مع الزيادة دى مافيش اى تقدم فى اى حاجه.. يعنى الناس تزيد و العربيات تزيد و الشوارع هيه هيه مش بيحصلها حاجه.. يعنى شارع زى شارع الهرم ده مثلاً من ساعة ما وعيت عليه و هو كده.. كل اللى حصل فيه انهم اتفزلكوا و قفلوا فتحات و فتحوا غيرها فى حتت تانيه مالهاش معنى.. لكن مخرج الشارع واحد و هو نفق الهرم.. كام بنى ادم بيستعملوا نفق الهرم و كوبرى الجيزة علشان يروحوا شغلهم أو الجامعه.. و هل عدد الناس ده ما تغيرش من ساعة ما النفق ده اتعمل.. لأ طبعا ً اتغيروا و كتروا لدرجة اننا عايزين نحط صابون على جوانب النفق علشان الناس تعرف تتظفلط منه الصبح.. طيب عملوا الدائرى كتر الف خيرهم.. المشكله مش فى الدائرى نفسه المشكله تكمن فى ازاى اصلاً الناس توصل للدائرى لما اشارة المريوطية دى اشهر من النار على العلم.. سنه على بال ما تعدى الاشاره و طبعا تكره نفسك و اليوم اللى قررت فيه تطلع الدائرى على العلم بإنه ملاذ الكثيرين.. فما بالكم بشارع الهرم..

يعنى لما الطريق من 6 اكتوبر للدقى يتاخد فى نفس الوقت اللى بناخده من الهرم للاسكندرية.. يبقى انا عندى اروح اسكندريه كل يوم ارحم ما يتحرق دمى كل يوم و انا رايحه الشغل.. اهو على الاقل حاروح استجم و ارتاح شوية اول ما شوف البحر..

على العموم لا يسعنى الا ان اقول للمسئول عن اللى احنا فيه ده.. حسبنا الله و نعم الوكيل فيك يا شيخ.. أو "فيكم" لو كان المسئول اكتر من واحد..